– Fleire store investeringar dei siste åra har rusta Hydro Årdal til å levere lågkarbonaluminium av høgaste kvalitet til dei mest krevjande kundane i Europa i lang tid framover. Eg gledar meg til å bidra til å videreutvikle verket som ein framtidsretta arbeidsplass og hjørnesteinsbedrift i eit levande og aktivt lokalsamfunn, seier Halkjelsvik.
Halkjelsvik har eit hovudfag i miljøkjemi frå NTNU og starta Hydro-karrieren i 2006. Dei tre siste åra har ho hatt ansvar for å følge opp anodeproduksjonen i Hydro. I den nye rolla si vil ho rapportere til leiar for primærproduksjonen i Noreg, Johan Berg.
– Sjølv om aluminiumindustrien for tida er prega av ei utfordrande marknadssituasjon, er utsiktene for aluminium gode i eit Europa som skal gjennom det grøne skiftet. Metallet frå Årdal er mellom anna ein viktig del av Hydro sitt strategiske partnarskap med leiande europeiske bilprodusentar som Porsche og Mercedes-Benz. Vi er heldige som har fått Anveig til å leie verket inn i framtida, seier Berg.
Hydro Årdal har meir enn 500 fast tilsette. Med årleg kapasitet på over 200.000 tonn elektrolysemetall er verket eit av dei største anlegga for primæraluminium i Europa.
Halkjelsvik tiltrer i stillinga 2. april 2024.
Publisert: 6. mars 2024